حكايتي (أمنيه وتحقيق حلم )..(د.فهدبامحرز)

[عذبة المعاني]

حكايتي (أمنيه وتحقيق حلم )..(د.فهدبامحرز)

الله يسعد اوقاتكم بالخير
بعد نقاهه اسبوع عدت لكم لأطرح تجربتي مع التكميم
...............
بعد يأس وإحباط ..لاح لي نور الأمل.. صح إني أنخرشت لأن الأتصال جاني وانا مروقه المغرب وسمعت ..تعالي الحين وعمليتك الصبح حسيت القلب طاح في المعده هههههه قلت قل لا اله الا الله ..قال حق الصبح ننتظرك اجل وصومي وجهزي عمرك .. قاله والا ماقاله حسيت بفرحه وبكوه خوف ..ضميت عيالي وبكيت انا واياهم هههههه وابونا يضحك ويقول فلم هندي ذا ههههههههه..المهم فزيت جهزت كل مايلزمني للتنويم وماتعلمته منكم اخواني المكممين ..ورحت التميمي قسما اطالع في كل شى اشوفه دبل من الربشه هههههه ..خنبقه خوف المهم صمت من 9 مساء وعلى سوائل الين 12 ووقفت اتصلت عليه جنتي (أمي) الله يحفظها وقلت بامرك واستغربت لتأخر الوقت ..ترددت اعلمها لكن قلت الدنيا حياة وموت لازم استسمح منها ومن الوالد لانهم ماكانوا راضين اسوي العمليه خوفا من مضاعفاتها واطلبهم الدعاء لي ..موقف صعب والله دخلت ماسكه نفسي وحابسه دمعتي وقلت سامحوني وادعوا لي الا كلن ماسك زاويه يبكي ماقدرت اكمل حبيت روسهم وطلعت مودعه لهم ولاخواني وعلى بيتي مامداني اوصل الا جنتي تقول جيبي عيالك الحين مابنام الا وهم قدامي وعشان ترتاحين ماتقعدين تطالعينهم وتبكين ثمن بكت هيه ياحياتي يالام لبستهم ووديتهم ويسلمون على راسي وكفي وودعناك الله ياامي وقلبي تقطع حزن كاني رايحه للموت ههههههه الحمد لله والشكر حتى الصغير طلعته اول واحد ولاحبيته عشان مايبكي وانا ماينقطع قلبي زود ..رجعت لبيتي وهاتك ياجرد لمعلوماتي السابقه ونوتتي الي سجلت فيها كل شى وعيا النوم يجيني ويستلموني خواتي المتزوجات الله يسعدهم اتصالات وسوالف يقطعون عليه الوقت يعرفون اني قلقه ..شوي وحسيت بنعاس الظاهر ان الضغط انخفض ههههه ونمت ساعتين وقمت الفجريه صليت واستخرت للمره الاخيره وارتحت لبست وعلى الجامعي وديني هههههه اعد اللمبات واستغفر وادعي الين وصلت استقبلوني ودخلوني تنويم ..

Cant See Images

وعلى هالشباك وكلت امري لله وقلت لزوجي تقعد معي الين ادخل ..قال جاك الموت ياتارك الصلاة هههههه يبغاني اهون لكن ماش مصره على رأيي..قال ماعليك امورك طيبه لاقالوا عمليه كلميني ..قلت الله اكبر عليك يابوسروال وفنيله ماتقدر تصبر ساعتين معي ..قال لا ..وملامح الوجه توحي بخوف اكثر مني هههههههه قلق واسئله متى العمليه قالوا بعد الظهر وكاني هديت شوي سووا لي تخطيط قلب سريع واشعة صدر ..وجاني طبيب التخديروكم سؤال ومشى ويوم دقت الساعه 10 ونصف الا 3 مسنترين قدامي بهالعده جهاز مساج للارجل اكرمكم الله والارقيله بعد العمليه ههههه والجوارب الي تحمي من الجلطه

Cant See Images

هنا بعد اللبس

Cant See Images

ويوقولون يالله غرفة عمليات وتعالوا شوفوني قسما بالله رجولي الله يكرمكم تتصافق واسناني ..مسكين ابن آدم مااضعفه ..مر عليه الوقت من الساعه 7 الين 10ونصف كنها عشر سنين وفجأه قلت ليته مامر ههههههههه..نزلوني واسئله بغرفة الانتظار نصف ساعه وانادي طبيب التخدير قلت يرحم امك ياتدخلوني ياتطلعوني احس بخفقان لعبتوا بأعصابي وبكيت ..مات ضحك عليه ههههههه وقال ابشري طيب تبغين شى او توصين شى قلت ايه قال ليه تبكين احد جبرك على العمليه زوجك اهلك صدقيني ماتسوينها لو ماتبغين مادرى اني احارب لي سنين عليها... قلت لا عندي طفلين معاقين وحزينه عليهم اخاف يجيني شى ومايلقون من يهتم فيهم دعا لي ولهم وقال وغيره قلت ابغى اسال الدكتور فهد بيسوي لي خياطه بعد العمليه عشان التسريب ضحك قال ابشري وش تبغين غرزه بس كنافه سراجه هههههههه ضحكت غصب الا الممرضه تقول يالله عمليه ..دخلت الا الغرفه فل رجال ياربي يالخوف ناس يسمكرون في الارجل وناس في الايادي وناس تفحص عطوني الاكسجين وطبيب التخدير الله يوفقه ذاك الادمي يلقني الادعيه والايات ثمن قال لي كلمه بلهجتنا الجنوبيه ههههههه وضحتك ولاعاد دريت عن عمري ..الا الممرضات يصحوني الحمد لله على السلامه وفيني الم الله لايوريكم حسيت انهم سووا لي عملية قلب واصيح عليهم ...حلفوا ماخليت دعوه وحلف ههههههه طبعا ركبوا لي انبوب الي بالانف والي بالبطن
وشربوني ثاني يوم الصبغه الزرقاء لكن ماسووا لي اشعه وخفت هذي هيه

Cant See Images

وشالوا الانابيب حق الانف 2 يوم وحق البطن 3 يوم
عانيت يومين صعبه ومنعت اهلي من زيارتي عشان مايحزنون عليه واتأثر .. الحمد لله على تيسير الامور ونجاح العمليه صحيح حسيت بندم على قرار العمليه وقت الألم.. ولكن الحين بدت الالام تخف وبدأ الحماس للرشاقه يكبر .. نصيحه لمن يقرأ حروفي مايتردد ويفكر بصحته وراحته وان هناك من هم يحتاجونه ولذا لابد ان يتحدى الصعوبات لاجلهم ..
هذي أدويتي
ابر السيلان_علاج الحموضه_علاج الغثيان__مسكن خفيف _مسكن قوي

Cant See Images

دعواتكم لي اخواني واخواتي ..ومااستغني عن توجيهاتكم ونصحكم لي ..
شكرا لكم جميعا على الدعم والتشجيع والتوجيه
شكر خاص لابوصالح وسكري الرياض وتركيا على وقفتهم معي ..

المصدر: منتديات رشاقة

 

[سكري الرياض]

Cant See Links

ماشاء الله الف الف الف مبروووووووووووووووك اختي عذبة ... والله يتمم لك بخير وصحة وسلامه يارب ...
وعقبال تبشرينا بالمثالي يارب ...

دمتي .. وكلي شكر على طرح تجربتك ..

 

[عذبة المعاني]

الله يبارك فيك ويسعدك اخوي
وفقك الله على جهودك واهتمامكم بأخوتك المكممين
لك مني دعوات بظهر الغيب هنا شكر وتقدير..

 

[تركيا]

الحمدلله اللي من عليك الله وقومك بالسلامه



ربي يوفقك ويتمم لك فرحتك برشاقه وانتي بأتم صحه

 

[*ابو صالح*]

الف مبرووك واسال الله فيها الخير لك

في دينك ودنياك...

واسمحي لي ادخل على موضوعك واعدل لك الصور

 

[*ام سارا*]

الحمد لله ع سلامتك

والله يتمملك ع خير وعقبال ماتفرحي بالجديد

وكنت بطلبك نفس طلب ابوصالح اعدلك الصور وتصير ظاهره


بس اخونا دايم سباق

 

[شوق النجوم]

عشت معك اللحظه عذبة ضاق صدري مرررره وانتي تكتبين عن عيالك واهلك

لكن الحمد الله على عودتك لعيالك واهلك سالمة الله يتمم لك الصحه والعافيه وتفرحين بالرشاقه

الف الف مبررررررروك

 

[prince hind]

الحمد لله على سلامتك

و الف مبروووك التكميم ،،، الله يجعله من اجمل قراراتك و تفرحين بنزول وزنك و وصولك للمثالي

 

[*ابو صالح*]

بي عنش ،،، دموعي صارن تملي الزبير قسم ..
هيا مقروعة من المشغوثة و العريكة والمسيلة و المبثوث.

الا ... دختور التخدير مذا قال لش خذت موتش ؟

 

[شوق النجوم]

المشاركة الأصلية كتبت بواسطة *ابو صالح* Cant See Links

بي عنش ،،، دموعي صارن تملي الزبير قسم ..
هيا مقروعة من المشغوثة و العريكة والمسيلة و المبثوث.

الا ... دختور التخدير مذا قال لش خذت موتش ؟

ههههههههههههههههههههههه

ابو صالح ترجم لنا هههههههههههههه

ههههههههههههه