تكممت في مستشفى العمادي( د.محمد العمادي)

[مهاوو]

تكممت في مستشفى العمادي( د.محمد العمادي)

السلام عليكم ورحمة الله وبركاته

تلبيه لطلب اخوي الغالي ابو صالح ورغبة مني لافادة من يبحث عن معلومات بخصوص

عملية التكميم في مستشفى العمادي بقطر

العملية تكلف تقريبا خمسين الف ريال قطري لكن بما اني قطرية فالتأمين ولله الحمد

شملني وسويت العملية على حساب التأمين

بعد الاستخارة توكلت على الله واخذت موعد عند الدكتور محمد العمادي طبعا التأمين يغطي فقط

من كان كتلة جسمة 40 وفوق الا وحطووو اربع خطوط تحت الا من كان عنده مشاكل صحيه تلزم

باجراء العملية يستثنى المهم اخذت الرقم لعيادة الدكتور الساعة ثنتين الظهر لان السستم

مايفتح الا بعد مايخلص الدكتور من العمليات اللي هي تكون في الفترة الصباحية وكان قدامي

تقريبا خمسين مراجع انصعقت متى جووو هالخمسين والدكتور يبدا العيادة الساعة خمس

المغرب طلعت ورجعت المغرب طبعا ماخفيكم كانت العيادة مليانه ناس ومن الاوزان الثقيله كنت

عندهم رشيقة كثيررر وقلت اكيد انه بيطردني مع الباب لان كتلت جسمي كانت 37 والناس اللي

اشوفهم هم اولى مني بهالعملية كنت بطلع وبكنسل الموضوع بس قلت اقعدي وقابلي الدكتور

وشوفي وش بيقول تعبت من الانتظار اصلا اكره الانتظار واخيراااا جاء دوي ودخلت حوالي الساعة

عشر ونص والدكتور اصلا تعبان حده من المراجعين وكثرة ترديد نفس الكلام لكل مريض وشرح

موضوع العملية ولااني كنت متطلعة على خطوات العملية من خلال هذا المنتدى الرائع واللي

اعتبرة منتداي ماسالته عن اي شي عن العملية هو بنفسه يخطط ويشخبط على ورقتي ويكتب

اللي اقول له عليه طبعا انا انهديت عليه كاني اتوسله يسويها لي استغفر الله يارب مايعاقبني

قمت اخربط واجيب له صواريخ لعل وعسى يوافق يسويها لي قلت له ركبي توجعني وانا مليت

من الرجيم وظهري يعورني مكان ابر الظهر ظرايب الحمل وفيي سكر حمل واشاخر وانا نايمة

ترضى يطلقني زوجي ترضى ؟ تكفى سوها لي وضحك قال كتلتك مايشملها التأمين بس بذكر

كل اللي قلتي لي عليه ويمكن يستثنونك لانه فيه استثناءات قلت له رووووووح الله يوفقك انت

بس خط لي التوقيع وربك يسهلها عطاني اوراق الفحوصات وقال سويها اول عقب بنشوف وش

نسوي عطاني تحليل دم وشعة ومقابله مع دكتورة البنج والتغذية وسويتها كلها في اسبوع

ورجعت اقابله ورجعنا للزحمة مره ثانية والانتظار وبعد المقابله قال خلاص اللحين بنرفقها مع

التقرير وانتظري واذا وصلك مسج من التأمين بالموافقة حيااك نكمل الاجراءات انتظرت تقريبا عشر

ايام وجاتني الموافقة ولله الحمد والمنة وطرت من الوناسة وسجدت شكر لله على نعمتة رحت

المستشفى ورريت الاستقبال المسج وقامو باجراء اللازم وتواصلت مع السستر وفتحت لي دفتر

بداية الرشاقة وقالت يالله اول يوم برمضان بيكون عمليتك قلت لها كلا ولن ولا اي خلاص ضمنت

الموافقة وقمت اتشرط قلت لها ابيها بعد العيد خليني اتمتع واستمتع بخيرات رمضان وحلويات

العيد قالت لي ابشري وتم خخخخخخخ طبعا هالكلاام من راسي ولا شي منه صار لان السستر

فلبينيه الصحيح انها قالت ااذا ماتبين بداية رمضان بكيفك اختاري اليوم اللي تبين واخترت تاريخ

يصادف بعد العيد والناس مسافره ولاهيه عني ومرت الايام وليلة العملية رحت حضرت عرس

وفليتها وجات الساعة عشر المفروض اصوم خلاص بس لا ابيت وزودتها نص ساعه من عندي

وهاك ياااكل رجعت البيت وجهزت شنطتي هذا واللي معاي في البيت محد حس بشي ولا احد

يدري عن عمليتي من باب ودارو اموركم بالسر والكتمان محد كان يعرف بتاريخ العملية ووقتها الا

امي وزوجي فقط الناس والاهل يسمعوني ويدرون اني ابي اسويها بس متى الوقت كان مجهول

بالنسبة لهم جاء يوم العملية ورحت لهم من الصبح بدري ودخلوني غرفتي اللي بقيم فيها

وعطوني اللبس وركبو لي الابرة وقاسو لي السكر وانصعقت انا صح قلت لهم فيني سكر حمل

بس ماكنت ادري انه استمر معاي لااني بعد الولاادة بشهر فحصت وقالو لي خلاص النسبة

طبيعيه بس انتي قابله للسكر مع زيادة الوزن وفعلا كان وزني زايد بس نسيت موضوع السكر

كلش المهم نسبة السكر فوق ال 300 قالو يمكن من الخوف وكذا وعطوني ابره انسولين وانتظرت

لين الساعة تسع وعطوني دواء بالفم ونزلوني يزفوني للدكتور محمد وانا اوصي امي وامي تقول

يارب يكفيني شرك يالله روحي ولاتتاخرين علي خخخخخ هو بكيفي يالغاليه ؟ قعدت تقريبا

حوالي الساعة على السرير في غرفة انتظار ومعي اثانين مرضى من غيري وكانت الغرفة

هدووووووووووووء الا من اصوات الذكر والاستغفار اللي اسمعها من ورى الستارة من المرضى

اللي ينتظرون ادوارهم مثلي المكان كلة ستاير ومافيه اي وسيله لمعرفه الوقت والانتظار ذبحني

الحمدالله ماكان فيه خوف كنت عادية جدااا وكل شوي داخلين علي دكاترة بنج ودكاترة تعقيم

ومادري من الا الدكتور محمد ماشفتة الا وهو بالممر ويدخل غرفة العمليات للمريض اللي قبلي

جاء دوري وزفوني لغرفة العمليات وشالوني من سرير لسرير وقوامو يهندسون فيني اللي يقرى

اسمي ويسالني واللي يمسح على شعري واللي يمسك يدي ويثبت عليها قياس الضغط

واللي ماسك اليد الثانية ويركب لي محلول البنج وباقي الادويل واللي يحط تخطيط القلب واللي

يحط علي اللبس الاخضر دوووشة وكلت يشتغل وانا ماغير اتلفت تقولون رقبتي صايرة مروحه

فجاءة فقدت الاحساس بالعالم اللي حولي وماوعيت الا وانا اصرخ وقاعده على حيلي وثنتين

ماسكيني يبوني انسدح وانا ماغير اصرخ وتوجد هههههه كان الم اول مره بحياتي احس فيه شي

متعب وقوي يبي يخرج بس مادري وين والا وشهو شي اتعب وانا اوصفة ولا اوفيه حقة طبعا لاني

بحياتي ماسويت عمليات ولله الحمد كانته هالعملية اول تجربة لي صرخت عليهم قلت ابي

الحمام ابي ارجع جابو لي شي عشان ارجع فيه بس ماطلع معاي الا هواء لاني صايمة وبطني

فاضية والحمدالله بعدها ارتحت اثر هالحوسة كلها من الهواء اللي انفخو بطني فيه نص ساعه

وطلعوني لغرفتي ولامي الغاليه فديتها بعد ماراتحت ونمت قاسو لي السكر وبعد كان مرتفع

وارجعو عطوني الانسولين مرتين وكانو يعطوني الماي بالمغطاه ويقولون لي اشربي رشفات

وامشي ماكنت احس بالم كثير في بطني الا اذا انسدحت على جنبي الايسر بس كنت اكابر

وانام عليه لان الدكتور قال لي عادي اذا مافيه الم ثاني يوم سووو لي اشعة الصبغة للكشف عن

التسريب والحمدالله مافيه تسريب قعدت في المستشفى يومين والمستشفى نظيف والعناية

فائقة والنيرسات متعاونين ومن تدق الجرس جاو يركضون عطوني موعد بعد اسبوعين ورحت لهم

بس ماقدرت اقايل الدكتور محمد لكثرة المراجعين والمرضى قابلت الدكتور حسان وعطاني

مكملات وادوية عقب سحبت على المراجعات لان هالمنتدى الطيب كفاني من المراجعات

والاسئلة الله يجزي كل من قام عليه بخير ويكتب اجرهم وبس سلامتكم ادري اني بثرتكم بكثر

القرقة بس حبيت اذكر لكم تجربتي بالتفصيل الممممممممللل

المصدر: منتديات رشاقة

 

[*ابو صالح*]

الف شكر اختي العزيزة / مهاوو
على نقل وكتابة تجربتك لفائدة اخوانك ...
واسال الله لك الاجر و المثوبة

 

[prince hind]

مهاااووو


يا حبي لاسلوبك ههههههههههههههههههههههههههه


الله يتمم عليك يارب ... و توصلين للي تبينه و انتي بصحه و عافية


من جد المنتدى له فضل علينا كبيييير بعد الله

الله يجزاهم خير يارب


و ان شاء الله يستفيدون من تجربتك
Cant See ImagesCant See ImagesCant See Images

 

الله يتمم عليك بالخير وتوصلين للمثالي قريب

 

[شوق النجوم]

ماشاء الله مهاوو

الف مبروك

والف شكر لك على نقل تجربتك

 

[راشــــد]

ماشاء الله عليك اخت مهاوو احسبك متكمم من زمان

مبروك التكميم والله يسهل لك النزول بالصحه والعافية وعقبال المثالي

وبالتوفيق

 

[السعدي2006]

مشكوره على نقل تجربتك في التكميم مع الدكتور محمد العمادي وانا ان شاء الله بديت اسوي اجراءات التكميم عنده وان شاء الله يكتب اللي فيه الخير

 

[لولو2020]

الله يستر انا عمليتي قربت عنده الله يتمم على خير

 

[فوفو2015]

الحمد لله على سلامتك
والله يتمم لك بالصحه والعافيه يارب..